Өлеңдер ✍️

Кегі бардай өзімде алынбаған,
Кім көрінген шошайтты қолын маған.
«Шыда, балам!» – дейсің ғой,
Көріп тұрып
Қайтіп қана шыдаймын, жаным, далам!
Жүйрік болсам ауыздық салынбаған,
Əлі менің терім көп алынбаған.
«Сабыр, балам!» – дейсің ғой,
Біліп тұрып
Қалай сабыр қылайын, жаным, далам!
Сыйласа да шаттығын өмір маған,
Жүрегімде мұң да бар арылмаған.
«Шыда, балам!» – дейсің ғой,
Шыдармын-ау,
Шыдамның да шегі бар, жаным, далам!
Күйігімді еріксіз қалыңдаған
Баса алар ма жігерім жалындаған.
«Сабыр, балам!» – дейсің ғой,
Əй, білмеймін...
Төзім қалмай барады, жаным, далам!