👈 қаріп өлшемі 👉

  Өлеңдер ✍️

  26.05.2022
  38


Автор: Сәндiбек Жұбаниязов

Ақын өлді

Өліп қалды, сорлы ақын,
өліп тынды,
Өміріне
жырымен теліп шыңды.
Дана мұра қалдырып
дүниеге,
Танабына жүректің
егіп мұңды.
Өліп қалды сорлы ақын,
өліп тынды.
Нұрлы күнді
шуағын жерге төгер,
Жұтты түнек –
қайғы әкеп елге шегер.
Өліп қалды...
көбейді “дос-жақындар”
Жауығысып өтетін
өлмесе егер.
Құбылуға
адамдар демде, – шебер.
Өліп қалдың...
Өлмейтұғын
артыңда өлең қалды.
Өнерді емес – қара жер –
денеңді алды.
Сенің жалын жырыңмен
жібітерміз
Көкіректе қатталған
шемен-зарды.
Өнер қалды артыңда,
өлең қалды.
Қиялыңмен
әлемді кездірдің де
Қамкөңілден
қайғыны бездірдің де,
Және, және...
Қай кезде де жақсылар
Құтылмасын жаманнан
сездірдің де –
Өте шықтың өмірден,
тез жүрдің де.


Кейінірек оқу үшін сақтап қойыңыз:



Пікір жазу


Біз cookie файлдарын пайдаланамыз!
Біздің сайтты пайдалануды жалғастыра отырып, сіз сайттың дұрыс жұмыс істеуін қамтамасыз ететін cookie файлдарын өңдеуге келісім бересіз. Cookie файл деген не?
Жақсы