Өлеңдер ✍️

Тулатқан тақымында сан асауын,
Бабалар ізі жатқан дала-тауым.
Сақтаған сары майдай салт-санамды,
Ақсайым алтын бесік ақ отауым.
Айна көл айнасындай көңіліңнің,
Айғағы ащы-тұщы өміріңнің.

Аталар ат шалдырған алтын тауым,
Сетері жүректегі сенімімнің,
Ақсайым, айналайын ақ бесігім,
Өркені қуантады өңіріңнің.
Қоңыр жел ескен қоңыр белестерім,
Көзіндей көнелердің елестедің.
Жыңғылды жылғаларым- жырау далам,
Шертеді керуенімнің кеңестерін.
Төсінде тұлпарымнан тұяқ қалған,
Көшінде сұңқарымнан қияқ қалған.
Шалқытып шарапатын шаңырағымның,
Кенішті кеудесінен күй ақтарған.
2011. 8. 2