Өлеңдер ✍️

Жас едік біз уыздай, өндір едік,
Тап-таза еді жанымыз, мөлдір едік.
Ақырғы рет көрісіп тұрғандайын,
Жасаураған жанармен елжіредік.
Табысатын қос жүрек сағынысқан,
Мұнар кешкен кезіміз, сағым құшқан.
Менің жаным шалқыды шалқарың боп,
Сен – шағалам қанатын қағып ұшқан.
Ханбазардай маңайы жағажайдың,
Сайран салдық тұсында тамаша айдың.
Сарша-тамыз балқытқан денемізді,
Салқындатқан суымен шалқар айдын.
Соншалықты іңкәрлік, ынтызарлық,
Емес еді жай ғана қызқұмарлық.
Бір көргеннен ғашық боп сүйгеннен соң,
Билеп алды жүректі шын құштарлық.
Шынайы едік, шіркін-ай, адал едік,
Дайын тұрдың кетуге маған еріп.
Жолдарымыз кетті де қиылыспай,
Бола алмадым өмірлік саған серік.
Жас едік біз уыздай, өндір едік,
Тап-таза еді жанымыз, мөлдір едік.
Енді бүгін зар болып бір көруге,
Емірендік, егілдік, елжіредік...