Өлеңдер ✍️

Жиһанкез – сен, отырықшы мен екем,
Мәскеу асып кеткен қандас кемде-кем.
Көк теңізге дейін барса Бату хан,
Өз елінен ұзамаған Кенекем.
Ұлы Қытай қорғанында,
Суомидің орманында,
Сылқым Париж орамында,
Тоғыз жолдың торабында адастың,
Тау-тас кездің, теңіз кештің, қар бастың.
Гольфстрим жылы ағысын сезейін,
Ойша мен де біраз жерді кезейін.
Шет-шегі жоқ жер дөңгелек, жер жұмыр,
Қолыңды бер, кездесуге кел дейін.
Балтық жақтан тіл қатшы,
Көріскенше күн жақсы!
Баурайында Алатаудың,
Жағасында Балатонның,
Етегінде Кракатаудың*,
Беткейінде қырат-жонның тыңайдың,
Атажұртты аңсап бірақ мұңайдың.
Асқар тауды, сар даланы ұнаттың,
Өзіңді өзің бекер ғана жылаттың.
Кәрі әкедей күткен ұлын адасқан,
Сен келгенше мен тосамын, қымбаттым.
Наз күлкіңді тыңдатшы,
Көріскенше күн жақсы!
Hotmail.com күн-түн әзір тұр хатшы,
Үнсіз қалмай, үздіктірмей тіл қатшы.
Көріскенше күн жақсы!