Өлеңдер ✍️

Тәтті түс көріп,
ұйқыда жатқан балбырап,
оянды Ғалам,
оянды балам,
ұйқыдан тұрды албырап.
Тамаша неткен таңғы шақ,
Саф ауа тыныс ашады.
Жайқалған қырда балқұрақ,
Маңайға жұпар шашады.
Толқындай жалы төгіліп,
Құлыншақ кетті шапқылап.
Шуағын төгіп, күн күліп,
Маңдайы жүрсін жарқырап.
Сәлем Әлейкүм, Гүлғалам,
Жұлдыздар, аспан, Күн мен Ай.
Сау-сәлеметсіз бе, жан анам,
Сардалам, шалғын көкорай.
Жанбауыр, есен-саусың ба,
Қалайсың, достым, жан құрбым.
Өтті деп жылдар таусылма,
Талайлы болсын тағдырың.
Аман ба көршім, айналам,
Есен бе ізгі бар адам.
Ер жеткен мынау қай балаң,
Ат жалын тартып жараған?
Мезетке сәлем, ғасырға,
Татысын әр сәт мәңгіге.
Азаттық атты асылға
Сәлемің – бөлек әңгіме.
Бармысың, шаттық, мұң-шерім,
Жап-жасыл желек, бақ абат.
Армысың сұлу, қыз керім,
Мөлдір де тұнық махаббат!
Нұр әлем ашса жыр-құшақ,
Бола ма өшіп сөнуге.
Үйретші бізді құлыншақ,
Өмірге шындап сенуге.
Қансын деп мейір көктегі
Күнге мен тостым жүзімді,
Қызуын сыйлап от демі,
Бойымда қуат түзілді.
Қансын деп мейір жердегі
Еліме қарап сүйсіндім,
Алмақтың бар деп бермегі,
Іштей бір бекіп түйсіндім.
Арманым – талмай шырқасам,
Ән-жырға бөлеп жер бетін.
Әлем боп қалшы әрқашан,
Көз жауын алып келбетің!