Өлеңдер ✍️

  22.05.2022
  65


Автор: Сəбит Бексейіт

Жүректен қозғар сырым бар...

Бәрің де: қызың, ұлың бар,
Бет-жүздеріңді бұрыңдар.
Құлақты түріп тыңдаңдар,
Жүректен қозғар сырым бар...
Сырым бар қозғар жүректен,
Тұратын арман, тілектен.
Заман мен Адам туралы
Толғанып талай күн өткен.
Бұйырса егер саған дәм,
Күтеді Бақыт, Бақ алдан.
Мазамды алды түйткілді
Мәселе: Жаһан – Жаһаннам.
Қайтемін сөз ғып наданды,
Асқақ ой жаулап санамды,
Жұмыр жер қалып, жыр еттім
Он сегіз мың ғаламды.
Сырым бар қозғар жүректен,
Тұратын арман, тілектен.
Көз жазып қалып қапыда,
Жанбауыр, сені жыр еткем.
Көңілім – көктем, жаным – жаз,
Жырым – наз менің, әнім – наз.
Қос ғасыр жырлап келгенім:
Аққу-қыз және гәкку-наз.
Жазғаным – назым, насыр деп,
Сырластым дәйім ғасырмен.
Құп көрсе қалың оқырман, –
Көңілім айран-асыр деп.
Ғасырға сырды ағыттым,
Қанатын қомдап шабыттың.
Ордалы ойдан іздедім
Ұясын бақтың, бақыттың.
Тыңдаңдар түріп құлақты,
Талай жан ұйып, ұнатты.
Қуантты сырым біреуді,
Біреуді сырым жылатты.
Құлақты түріп тыңдаңдар,
Шаттық бар сырда, мұң-зар бар.
Жылу бар айтқан кей сырда,
Кей сырда, бәлкім, ызғар бар.
Жайым жоқ әсте тынымдар,
Ат басын маған бұрыңдар.
Туындар бір ой бір ойдан,
Жүректен қозғар сырым бар...




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу