Өлеңдер ✍️

Қазақ,орыс тілдерінде зәр төккен,
Күні кеше айыр тілді жылан ек.
Жалыққан соң коммуналық ертектен,
Кірме тілі басым тұр деп жылап ек.
Қос тіл аз боп, ойлап таптық үш тұғыр,
Сағыз шайнап, жедік хот-дог, сэндвич.
Үш басы бар самұрықтай күшті қыл,
End bsder igerems English.
Маған бірден ұнаған сөз – Гудбай.
Мағынасын жазып қойдым ұмытпай.
Осы сөздің қазақшасы – Жақсыбай,
Дәлелдейін ізін енді суытпай.
Америка жинап жақсы байларды,
Маң-маң басқан Паң еліне айналды.
Алғаш солар барып қонған Айға да,
Марста да солар салар сайранды.
Ал біздің ел бар жақсыға құтаймай,
Таң атысы, күн батысы құр айғай.
Құт бай емес, жайлап алып Жұт байлар,
Жұрты Жұрдай, бай-манабы Құдайдай.
Қара құсша басып алып астына,
Ертелі-кеш жейді бітпес жемтігін.
Біреу алып қояды деп састы ма,
Қарбытам деп баса алмайды ентігін.
Енді бізге керек емес бай мұндай,
Өңкей сараң, кіл шық бермес Шығайбай.
Керек байлар шашып жейтін сұңқарша,
Жоқ-жітікке жәрдем берер тартынбай!
Қолы ашық мұндай жомарт Жақсыбай,
Зікір салып сарнамайды бақсыдай.
Қағып қалып алтын сауыт шақшасын,
Үлестіріп берер көпке насыбай.
Қалай жүрем шалқымай мен, тасымай,
Атып алып өткір, күшті насыбай.
Жалпақ елді Жақсыбайлар жайласа,
Жүрер едім жасқанбай мен, жасымай.
Good-bye!
Гудбай, Жақсыбай!