Өлеңдер ✍️

О дүниенің күту залында,
жүз жылдап, мың жылдап
отыр миғұла кеще де,
оқымысты ғалым да,
отыр еспе мылжыңдап
азанда да, кешке де,
осы отырыстың мәнісін айтып,
отыр жымып залым да,
аңысын аңдып.
Бұлар – жаны мың миллиард пенденің,
білмейді қалай, қашан келгенін.
Таңда Мақшар күнін
күтіп отыр бәрі де:
ер де, әйел де, жас та, кәрі де.
Күтіп отыр жақсы мен жаман да,
ізгі мен зұлым да,
қу, сұмпайы өздері бір команда,
отыр үнсіз жылым да.
Отыр ақкөңіл, аңғал да,
отыр сиқа мен аяр да.
Кімдер жоқ мұнда: таң қалма,
келіпті князь бен бояр да,
бірнеше нөмірлі патша ағзам да.
Мен мұндай көп мейман көргем жоқ
ешбір аэропорт, вокзалда?!
О дүниенің күту залында
отыр ұл-қызы үш бірдей нәсілдің,
бар ағы, сарысы, қарасы.
Жөні жоқ қылжақтың, әзілдің,
бәрінің үрейлі санасы.
Жүр сеңдей соғылып дінбасылар:
мүфтилер, ламалар, поптар да.
Оларға жалбақтап бас ұрар,
жендет те, ұры да, сотқар да.
Күнәдан арылу туралы
сұрайды ақылын, кеңесін.
Бәрі де үмітпен жүр әлі,
күтеді пейіштің белесін.
Өтуде жүзжылдық, мыңжылдық,
өтуде ғасырлар, дәуірлер.
Ешқайда кетпестей бір жылжып,
қынжылды мүһміндер, кәуірлер.
Уақыт мелшиіп қалғандай,
Адамзат күтеді ақырын.
Күтеді есінен танғандай,
кесімін айтатын Хақ үнін.
Күтеді адал да, харам да,
күтеді даңғой да, дана да,
Күтеді жомарт та, сараң да,
күтеді қарт та, бала да.
Күтеді барам деп ұжмақ төріне,
күтеді барам деп пейіш бағына...
Кейбірі келе алмай жөніне,
қарайды шағына, жағына...
Көзіне елестеп қайдағы:
қиямет қайым ... қыл көпір,
тозақ отының жалыны!..
Күні ертең шығардай ойраны,
көп бейбақ шарасыз үрке отыр,
тұс-тұстан уілдеп зар үні...
Бір Аллаһ біледі:
ішесің бе зәмзәм суын сен,
жай тауып жаның жәннатта?
Әлде қыл көпірде сүрінсең,
өтесің қиналып азапта?
Не маңдайың жарқырап,
хор қызын құшасың,
Не шыбын жан шырқырап,
тозақ отында шыжғырыласың?
Көкейде бір сұрақ:
қайсысы бұйырмақ –
жап-жасыл пейіш бағы ма,
тамұқта шалқыған от-жалын ба?
Соны күтіп отыр зарыға,
төзімі таусылып жалыға,
Адам ата – Хауа ананың бар баласы,
құласы мен аласы.
Күтіп отыр көрмей тыншу да, дамыл да,
О дүниенің күту залында.