Өлеңдер ✍️

  22.05.2022
  265


Автор: Сəбит Бексейіт

Он сегіз мың ғалам

Торығатын, түңілетін жоқ жөнім,
Аспан ашық, күлімдеп тұр көкте Күн.
Қыспаққа алса бұ дүние қысы кеп,
Қызықтаймыз о дүние көктемін.
Шын сарқылса бұл ғаламның қызығы,
Жарығы өшіп, кетсе бойдан қызуы.
17999 ғалам бар,
Бауырына басар бізді түзуі.
Бір Аллаһқа иманыммен сенемін.
Біздің ғалам Бұ дүние дегенің.
Ұғып өтсе жарар еді әр пенде
Арманның не, Бақыттың не екенін.
Кейде ұйқыда ғажап күйге енемін,
Алас ұрар жаным іздеп мекенін.
Тән – жердікі, Жан – көктікі, олаһи,
Өзге ғалам – О дүние дегенің.
Егер пенде кешпесе күн тұщынар,
Шер-шемен боп шеге берсе жиі зар,
Он сегіз мың ғаламның бұл бірінен,
Ол сорлығы титтей бақыт бұйырар.




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу