Өлеңдер ✍️

’’Халық жауы’’ ұсталып, ’’ұры’’ ұсталып,
қара тізім ұлғайып, ’’дұрысталып’’,
көгіс өңге сұс беріп қою мұрты,
қызыл мәрмәр мінберде тұр Сталин.
Кімді місе тұтады әл барында,
қиды өлімге ұлын да, жан жарын да;
қанға малған қылыштай жолағы бар
генералиисимус шалбарында.
Жау шапқандай шайқалтып шаңырақты,
талай үйді моладай қаңыратты;
жарын жесір, баласын жетім етіп,
талай ердің анасын аңыратты.
Көл болса да көз жасы – бір дір етпей,
міз бақпайды мелшиіп құдіреттей;
айдаһардай ысқырып ол тұрғанда,
өз үйінде бұққан жұрт күбір етпей.
Көрген күні көп жұрттың азап қана,
кетті айналып лагерьге азат Дала;
қызыл жендет қолында – қызыл балта,
қан сасыған бүкіл ел – қасапхана.
Аза күйі – реквием тартылған күн,
аясын ба АҚИҚАТ ант ұрғанды?!
Зұлмат сырын ұғынсын бүгінгі ұрпақ,
көрсет, Қызыл Диктатор, бар ’’тұлғаңды’’!..