Өлеңдер ✍️

  22.05.2022
  87


Автор: Сəбит Бексейіт

Екінші мыңжылдықтың соңғы жылы

Түгесілсе бір Мыңжылдық,
келесісіне құлшындық.
Мирас боп қалмақ, мінеки,
қуаныш-жалған, мұң-шындық.
Оң қылық көрсет, соңғы жыл,
сенімен кетсін мол қыжыл.
Соңғы сыр сендік сарқылып,
сәтімен тусын соңғы жыр.
Төнбе сен бізге тажалдай,
келме сен бізге ажалдай.
Тілеме енді құрбандық,
өте ғой, болды, өш алмай.
’’Ішке сыр бүктің несіне?’’ –
деп жұртым қатты кейісе,
қалсын электрон поштада:
www. poliqon. kz
Ұшақты жұттың, тынбадың,
кемені жұттың, тынбадың.
Қап тауын таптап, талқандап,
көрші елде бүгін жүр бандың.
Тасаттық енді тілеме,
далама келіп түнеме.
Рақымсыз күш бір – сұм тажал,
қаһарына міне ме?!
’’Ішке сыр бүктің несіне?’’ –
деп жұртым қатты кейісе,
қалсын электрон поштада:
www. proton. kz
Өжет тұр соңғы белес деп,
қиындықтармен белдеспек.
Сендірем, достым, соңғы жыл –
Уақыттың соңы емес деп!
Қорқақ тұр құт-бақ келмес деп,
көзіне әрне елестеп.
Сендірем, достым, соңғы жыл –
Ақырзаман емес деп!
Ұға алмай заңын нарықтың,
замандас, білем, тарықтың.
Пақырды қинар соңғы жыл –
ақыры емес Тарихтың!
Сан жанжал, соғыс, көп егес,
замана көшін бөгемес.
Ушығып тұрған соңғы жыл –
Кеңістіктің шегі емес!
’’Ішке сыр бүктің несіне?’’ –
деп жұртым қатты кейісе,
қалсын электрон поштада:




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу