Өлеңдер ✍️

Жаңа дәуір сөйлеп тұр Астанадан,
Елордадан сонар жол бастау алған.
Жас қаладан рухани ләззат тауып,
Қанаттанып қайтасың Бас қаладан.
Туды, міне, АСТАНА УАҚЫТЫ,
Қоңырауы даланың күмбір қақты.
Өзін-өзі билеуге қолы жетіп,
Басына елдің қонды ғой құт-бақыты.
Туды сәті, мезгілі Астананың,
Мақтанамын, риясыз шаттанамын.
Мәртебесі өсті де қазағымның,
Мейманасы тасыды боз даланың.
Сән-сымбатың жарасып бұла жүзге,
Көрік бердің, өң бердің құладүзге.
Сарыарқаның саф алтын моншағындай,
Ұна өзгеге, Астана, ұна бізге !
Ғасыр менен ғасырды алмастырдың,
Еуропа, Азияны жалғастырдың.
Қос құрлықтың боп тұрсың дәнекері,
Келешекке жетелеп Алаш жұртын!
Болашаққа Астана ұмтылғандай,
Арманы асқақ, өміршең жұртым қандай!
Хан Кене тұр біздерге сенім артып,
Бұлқынғандай жүрегім, жұлқынғандай!
Елорда кестесімен көлік жүрер,
Көш-керуен жолында өңір түлер.
Таңнан тұрып жасампаз халқым менің,
АСТАНА УАҚЫТЫМЕН өмір сүрер!