Өлеңдер ✍️

Коньяк ішіп масайып,
Жырқ-жырқ күледі әзәзіл...
Көргендей түсті ғажайып,
Марқайып отыр әл-әзір.
Табалап отыр Ауғанды,
Иракты отыр табалап.
Соларға бомба жауғанда,
Қуанған борбай сабалап.
Ауғанда құртып содырды,
Сойқанды жөнге салғандай.
Жеңімпаз болып отыр бұл,
Кабулды барып алғандай.
Бен Ладен болса дін аман,
Лаңгерлер аман мыңдаған.
Уағыз айтып ғұламаң,
Ғаскері қимыл шыңдаған.
Қақпанға түсіп құрылған,
Аумаған аңнан ауған-ай!..
Жазықсыз халық қырылған,
Алмаған басын сауғалай.
Шал-кемпір, сәби жылаған,
Жесірлер қарғыс жаудырған.
Көздерін жасқа бұлаған,
Жаутаңдап қалған балдырған.
Сіміріп отыр сілімтік,
Көзіне әрне елестеп.
Бұл қызыл күрең ішімдік
Ауғанның қаны емес пе?
Ақ дегені алғыс боп,
Қара дегені қарғыс боп,
Әлем жандармериясындай
Тайтаңдады АҚШ көп.
Күніге ойлап шығарар
Жүз амал, тәсіл, мың айла.
Жер жүзін барлап, сығалар,
Бағаны қойып мұнайға.
Бес құрлық түгел кіріптар,
Пайымдап көрші күйді осы.
Бұл ел – асауларды құрықтар
Тап бір Ғалам Политбюросы.
Несіне, малғұн, қуандың,
Басыңды шырмап сұм айла.
Өгіздің басына туған күн
Бұзаудың басына тумай ма?!
Сойқанды құртып Иракта,
Салғандай жөнге содырды.
Өзінен өзі ыржақтап,
Жеңімпаз болып отыр бұл.
Дін аман Саддам Хусейн,
Сарбазы сап-сау әзірге.
Басылып тынса шу кейін,
Кезекті бермек әзілге.
Көмегін алып Ресейден,
Кетуі мүмкін күшейіп.
Қиналып көп жұрт есейген,
Әліптің артын күтейік.
Шеһеризаданың Бағдатын
Құртам деу – сұмдық жауыздық!
Күштіге айтар бар датым:
Болмайды Атом – ауыздық!
Сіміріп отыр сілімтік,
Көзіне әрне елестеп.
Бұл қызыл күрең ішімдік
Мұсылман қаны емес пе?
Несіне, малғұн, қуандың,
Басыңды шырмап сұм айла.
Өгіздің басына туған күн
Бұзаудың басына тумай ма?!