Өлеңдер ✍️

Ғабиден Мұстафинге
Үлкен мақсат – қалауы жүректегі,
тұтас дәуір шындығы – жыр еткені.
Ғажайып бір ғаламды жайып салды
Заманының соқталы суреткері.
Алымды да көреген адам нықта,
Жол беріле қоя ма жалғандыққа?
Біліп жазған көргенін, сүйіп жазған,
Арлылыққа тәнтіміз, адалдыққа.
Елеп екшеп, салмақтап сөз тәуірін,
Тіл ұшына оралды өз дәуірі.
Әр шығарма бетінде – замандасы,
Әр сөйлемнің ішінде – астарлы мұң...
Халін айтып “Дауылдан кейінгі” елдің,
“Миллионердің” аулына дейін келдің.
“Қарағанды”,
“Шығанақ”,
“Көз көргенде”
сомдадың сен бейнесін зейінді ердің.
Бақытты ғой даланың қайран ері,
Болса егер де есімін айтар елі.
Тұлғалы аға алыптар тобындағы –
АЛАШТЫҢ сен мәуелі БӘЙТЕРЕГІ!