Өлеңдер ✍️

Кешкіғұрым жиылып, дейді қарттар сөз бастап:
Жөн… жөн… жөн…
Шақылдайды жанасып,
Соғылса егер тасқа тас.
Жақындайды жарасып,
Жолықса егер жасқа жас.
… Жөн… жөн… жөн…
Күлсе сұлу қиылып, сен де, жігіт, күле сал,
Гүлің мүмкін ол сенің, дүниеден үлес ал.
Елігіңді үркітпей, қолқа салсаң еппенен,
Елің-жұртың дер сосын “міне сері, міне сал!”
Дүниеге қос та үлес, тиесілі үлес ал.
Көсіп қойып сақалын, дейді қарттар көз тастап:
Жөн… жөн… жөн…
Шоқ ұшқындар тамаша,
Ұрылса егер тасқа тас.
Отау шығар оңаша,
Ұрынса егер жасқа жас.
… Жөн… жөн… жөн…
“Асыл тастан шығады, ақыл жастан шығады”,–
Атаң қазақ нақылын құйма құлақ ұғады.
Жігерлі жас қолынан астық-тасқын ағылса,
Өнерлі жас ойынан ғасыр-дастан туады.
Өсетін ел баласы өшпейтін жол қуады!
Дастарқанның басында дейді шұлғып бозбастар:
Жөн… жөн… жөн…
От болады лаулаған,
Үш соғылса тасқа тас.
Құт толады қамбаға,
Күш қосса егер жасқа жас.
… Жөн… жөн… жөн…