Өлеңдер ✍️

  21.05.2022
  209


Автор: Исламғали ҮРКІМБАЙҰЛЫ

Ағамен сырласу

Көрсетпей бөтенге еш қысым,
Үй тапсам тентіреп кешкісін.
Жанымнан жылылық сезінсең,
Сен мені бақытты деп түсін.
Бас ұрмай келетін пайдама,
Ұмтыла қоймасам жәй ғана.
Ашуға ермесем арпылдап,
Сен мені жуас деп ойлама.
Дөрекі мінезді санамда,
Тұтқындап ұстасам, жан аға,
Есерге естілік көрсетсем,
Сен маған жасық деп қарама.
Қарқылдап, қояды көп қарға,
Жақсының жанында кек бар ма!
Иіліп ілтипат көрсетсем,
Сен мені жағымпаз деп қалма.
Бұрылмай оңға да, солға да,
Таңдасам бейқұтшыл жол ғана.
Өнбес дау қуатын өркеуде,
Болмасам, қорқақ деп қорлама!
Артық сөз асырмай басымнан,
Өскемін, білесің, жасымнан.
«Ұлттың намысы үшін!»- деп,
Айқассам, табыл тек, қасымнан.




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу