Өлеңдер ✍️

Көлбеңдете қағып әсем қанатын,
Көбелектей гүлден ләззәт алатын.
Мен сияқты есі кете елітіп,
Сұлулыққа құмар шығар, бар ақын.
Байқайсың ба, әдемілік – жан емі,
Қандай көркем, адамзаттың әлемі!
Ой-арманы ізгіліктен құрылған,
Ғажайып қой, ақындардың өлеңі.
Әсемдікті етер дейді жан мекен,
Жан мекенін сезімменен әрлі етем...
Өн-бойыңды баурап алар балқытып,
Тілден сұлу сиқыр сірә, бар ма екен?!
Көңілімді көлегейлеп тұрар мұң,
О, перизат, саған қалай ұнармын?
Сұлулықтың қол жетпейтін Тәңірі –
Поэзия – бір өзіңе құмармын!!!