Өлеңдер ✍️

  21.05.2022
  103


Автор: Исламғали ҮРКІМБАЙҰЛЫ

Бақытты сәт

Атқылап жырдың бұлағы,
Жанғанда көздің шырағы.
Қанғанда жанның құмары,
Тілші қыз келіп жаныма:
«Бақыттысыз ба?» деп сұрады.
«Бақыттымын!» дедім ойланбай,
Қанатын шабыт жайғандай,
Аққу боп көлге қонғадай,
Ақынның қаны қызғанда –
Сәтімен сұрақ қойғандай.
Тергенде тілден жаһұтты,
Жүректер жырмен балқыпты.
Шабытты ақын – бақытты!
Құдіреті оның осында –
Ұмытып кетер уақытты...
Ұмытқам мен де, бәрін де,
Жиылған жасың, кәрің де.
Құлағыңды сал әр үнге...
«Бақыттысыз ба?» дедің бе?
Бақыттымын мен әрине!
Өзіме от боп өз демім,
Сезімнің нұрын сезгенім,
Қызғанбай бағын өзгенің,
Бақытты сәтім осындай –
Өлең оқыған кездерім!




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу