Өлеңдер ✍️

Қарт Алатау, Қаратауға қарасам,
Алтай әне, аумағы тым орасан.
Памир әне, Карпат міне, Альпі бар...
Сан жетпейді «қарттарымды» санасам.
Таулар, таулар, тауларыма таң қалам,
Таусыз жетім сияқты ғой паң Далам.
Қойны-қоншы аң мен құстың ұясы,
Балағынан байлығы әне саулаған.
Болғаннан соң Жаратқанның жаны ізгі,
(ойлап тапқан адам талай аңызды).
Желге ұшып кетпесін деп жазықтар,
Тауларымен қымтап қойған тәрізді.
Ортақ екен адамға Жер, мекен-бау,
(кейін шыққан бөлу деген бөтен дау).
Бар байлықты – өзі тауып алсын деп,
Тауларменен басып қойған екен-ау.
Тек жақсылық ойлағын деп Жаһанға,
Үлесіңді қосып жүр деп Отанға.
Арқас таудың алып шығып шыңына,
«Таудай бол!» деп бата берген атам да.