Өлеңдер ✍️

  21.05.2022
  102


Автор: Қалмаханбет Мұқаметқали

Маусым түні

Жалған – өмір, мұң – мәңгі,
Жалығу да, торығу да аз-мұз бар...
Жүрек көзі суланды,
Жапырақты тоңдырғанда жазғы ызғар!
Мың шиырлап миымды,
Мазалайды екі сезім: ізгі, әккі...
Маусым түні биылғы...
Маусым түні маздатпады , мұздатты.
Қысастық па бұл ісі,
Қайраты әлде қайтты ма екен бұрынғы?
Қарағаштар бүрісіп,
Қараңғылық құшағына тығылды.
Шаша алмадым шуақ қып,
Шымқай қара жаз түніне сырымды.
Шегірткелер... жұбатты,
Шілде де әлі келеді деп шіліңгір!
Жалған - өмір, мұң – мәңгі,
Жалығу да, торығу да аз-мұз бар...
Жүрек көзі суланды,
Жапырақты тоңдырғанда жазғы ызғар!
Мәнсізденіп ермегі,
Масаң көңіл жиып алды демде есін.
Мейірім мен мендегі,
Махаббатты суындыра көрмеші...
Маусым түні!




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу