Өлеңдер ✍️

Барарымды білмей қалай Өзіңе,
Баттым қанша күнәға.
Мазар сынды шалынбай ма көзіңе,
Менің мұңым – мұнара!
Жығыла алмай жанарыма жас алам,
Жүрегімнің ығына.
Тәріздімін тәтті судан босаған,
Төңкерілген құмыра.
Шорт кесілген үніне елтіп «Құранның»,
Шайтан-үміт ақырғы.
Зираттарға зиярат қып жұбандым,
Зікір етіп атыңды.
Құлақ ассаң енді айтатын күбірге,
Қол қусырдым иманға.
Кәлима тілім келді-ау түбінде:
- Лә илләһа илла Алла!
- Лә илләһа илла Алла!