Өлеңдер ✍️

  20.05.2022
  169


Автор: Дәулеткерей Кәпұлы

Ағажай, Алтай қайда, Сауыр қайда...

Ағажай, Алтай қайда, Сауыр қайда,
Жүрегің тауды ойласаң ауырмай ма?
Есіңе түскен кезде ескі мекен,
Төсіңнен қазбауыр бұлт мамырлай ма?!
Көңілің бір жадырап, бір түнеріп,
Кеткендей миығыңнан күлкің еріп.
Маңырап таутекесі Маңырақтың,
Сауырдың сауырынан бұлт үдеріп.
Қолыңа аспандағы Ай-шамды алып,
Басарсың аяғыңды байсалданып.
Самалы Сарыарқаның желпігенмен,
Жанары жәудірейді Зайсан қалып.
Кіндігің жалғасқанда Сауырменен,
Бірлігің артар аға-бауырменен.
Тауымнан мені туған айырмаса,
Арнар ем, сіз түгілі, Тәңірге өлең!




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу