Өлеңдер ✍️

Көлеңкеден күнге қарап,
Күшік ойым шәуілдейді.
Болашағым кімге аманат,
Елім қашан дәуірлейді?!
Кем қайырып келте күнді,
Шығарып сап қарауытпа.
Тыңдап қойып ертегімді,
Құлақ түрем жаңалыққа.
Қарсы алады қоғам күле,
Бақыттымыз күн ілгері.
Тірлігіме, жоқ әңгіме,
Теледидар тіліндегі!
Күлтөбеде құлтөрелер,
Ұлықсиды ұлттан қалыс.
Үмітім көрбілтеленер.
Ру үшін жыртқан намыс!
Маужыраған сиқым әлі,
Қайманамның халі мешеу.
Бір сәбиге ұйқыдағы,
Ертекшімнің саны бесеу!
Ерте, ертем кешке ұласты,
Уақытқа не етем налып?!
Есек мініп ешкібасты.
Ел деп қоям тепең қағып!
Ертегі ойым қыза түсіп,
Қиялымды қылам ермек.
...Хан қызына құда түсіп,
Таққа отырам мұрагер боп!