Өлеңдер ✍️

Сен секілді мен де адам,
Мен де кісі,
Көрінгенмен ортамда елге кіші,
Қалтамдағы ақшамнан бұрқырайды
Маңдай тер мен ақ адал еңбек исі.
Былай қойып осыдан басқаңызды,
Айтып сізге берейін жақсы аңызды.
Өзі білсін мына жұрт не десе де
Өзім жақсы көремін ақшаңызды.
Ел, әрине, еңбекті бағалайды,
Ауырына ауыр деп қарамайды.
Ақшаңыздан адалдық аңқып тұрса,
Алпыс екі тамырды аралайды.
Кейде қалай шалқымас көңіл елі,
Көзге дүние көрікті көрінеді.
Осындайда адал мен арам болып
Ақшаңыз да екіге бөлінеді.
Азаматтың ақысы – адал-ары,
Адалдық деп ақшаға қарағаны.
Оны қалай табамыз сол үшін де
Бізді екіге ақша да бөле алады.
Жырға толы жанымның кең өрісі,
Сары ала боп жайқалған көк өнісі.
Қалам ақы аламын,
Бірақ одан
Бұрқырап ақ тұрады өлең исі.
Сен секілді мен де адам,
Мен де кісі,
Көрінгенмен әр жерде елге кіші,
Ақша исі шығады еңбегімнен
Ақшамнан да шығады еңбек исі.