Өлеңдер ✍️

  17.05.2022
  125


Автор: Дәуітәлі Стамбекұлы

Жылдар жаңғырығы

Әрбір күн –
Уақыттың әрбір үні,
Әр күннің бар өзінше мәңгілігі.
Миымда,
Жүрегімде тулап жатыр
Жылдардың дауысының жаңғырығы.
Жылдардың даусы алыстан естіледі,
Естімей қалмайды да ешкім оны.
Менің де мойыныма асылады
Ай мен күн –
Табиғаттың қос білегі.
Білемін арманым не, тілегім не,
Пендемін: қайғырамын, күлемін де.
Өшпейтін іздері бар дидарымда,
Әр жылдың өз нәрі бар жүрегімде.
Әрбір жыл бір керемет сабақ болып,
Әр беті әр күн сайын парақталып,
Әркімнің сұрағына
Қиналмастан
Айтады өзі жақсы жауап тауып.
Аулақпын өткенімді жек көруден,
Сабақ ап қателесіп кеткенімнен, -
Әр жылым өнегелі ұстазым боп,
Үйреніп келемін мен өткенімнен.
Көктемім,
Күзім менен қыс, жаздарым,
Бал күнім,
Балалығым – құс базарлым,
Алыстан қолын бұлғап,
«Қалайсың?» – деп,
Жылдарым жымияды – ұстаздарым.




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу