Өлеңдер ✍️

  17.05.2022
  93


Автор: Дәуітәлі Стамбекұлы

Уақыт

Уақыт,
Саған менің бір айтарым бар:
Төгіліңдер, қайтадан шайқалыңдар.
Дөңгелеңдер менің де мазамды алып,
Он сегізімді өзіме қайтарыңдар.
Сен де аяулым,
Сүйікті келбетіңмен,
Келбетің сол –
Өзіңнің он жетіңмен,
Жаула,
Жаула жанымды жабырқаңқы,
Құтқар мені оты жоқ пенде етуден.
Жырым саған арналды назды ұқтырар,
Көңілдегі көгілдір сазды ұқтырар.
Бір адамға бір қайғы жатар жетіп,
Бір бақытың бірақ та аздық қылар.
Бір белгісіз патшалық құрып анық,
Бара жатыр мені ертіп,
Ғұмыр ағып.
Жастығымды барады жасауратып,
Бұйғылық жаныма кіріп алып.
Уақыт,
Сенен сұранар тілегім бар,
Дос көңілін жықпаймын.
Сүйемін жар.
Қайтарыңдар қайтадан жиырмамды,
Ақысына аздан соң жүрегімді ал.
Алаулайық, аяулым, өтінемін,
Мен бұл сәтте бәріне бекінемін.
Қайта оралмас жастықта жанайыншы,
Өртенбеген күніме өкінемін.




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу