Өлеңдер ✍️

  17.05.2022
  107


Автор: Дәуітәлі Стамбекұлы

Күтпеген кездесу

–Жүру үшін өмір атты жолда нық,
Өздерің де талай-талай толғанып,
Көрдіңдер ғой қайсы бірін айта алам,
Мен де ащының дәмін татып байқағам.
Ащы дейді. Ащыдан жұрт қашады,
Қашып жүріп талай белден асады.
Бақыт деумен өміріміз өтеді,
Сонда бақыт қайсымызға жетеді?
Әрине, оны қызғанбаймын ешкімнен
Өйткені оны аздау татып өстім мен.
Дәміне де көргенім жоқ құнығып,
Көргенім жоқ ширақ болып
Сұғынып.
Ауыр ойлар түспеген соң иықтан,
Қиындыққа өлең жазып шыныққам.
Айтыңдаршы,
Дәмі қандай бақыттың,
Соны шіркін бір татсам деп асықтым.
–Ей, бауырым,
Не деп бара жатырсың?
Өзің әлі шіп-шикісің,
Жасылсың.
Ерте шыққан күніңменен бірге атып,
Жылы үйіңде бірге түнеп,
Бір жатып,
Жүргенімді қалай ғана көрмедің,
Сөйтесің де ту сыртымнан сен менің.
Өмір бойы көрмедім деп сөгесің,
Қақпай тұрып өмірдің бір шегесін.
Сөгетіндей сонша мықты кім едің,
Қой оныңды, ренжіспейік,
Түлегім.
Егер менің шындығымды сұрасаң,
Көз жасыңды сүрте аламын жыласаң.
Сені білем, тым ақ көңіл баласың,
Әркімдерден жиі алданып қаласың.
Түсіне алмай ақиқатын,
Жалғанын,
Сен түгілі мен де алданып қалғанмын.
Жиі қонақ болсам саған мен егер,
Жақсы жырдан айрыласың сене бер.
Алғаннан соң меніменен достасып,
Ақындықпен кетер едің қоштасып.
Есімде ол да болмай қалған жоқ,
Сен ақынсың,
Ақындар да арман көп.
Ойлы болып шығу үшін өлеңің,
Сені әйтеуір ойландырсам деп едім.
Ал жарайды,
Сау болып тұр әзірге,
Түсінетін жігітсің әзілге.
Күтіп жүрем мен де сені елеңдеп,
Ойлы болсаң, жетем отты өлең боп.




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу