Өлеңдер ✍️

Сені менен басқаның қызғанбасын
Кім біледі,
Қызғанар қыз болғасын.
Нәзік жансың,
Еркесің,
Қылықтысың,
Бұл жасыңда
Аумаған күзгі алмасың.
Сен өртейсің,
Қанымды от қыласың,
Мұңды етесің,
Біресе шат қыласың.
Қылығыңмен қытықтап аласың да,
Шыңырауына сезімнің лақтырасың.
Мен де бір кез тәкаппар,
Биік едім,
Биіктікті жанымдай сүйіп едім.
Сендегі бар қылық пен әсемдіктің
Алдында енді еңкейіп,
Иілемін.
Иілемін,
Сүйемін,
Көңіл елі
Сенсіз құла түз болып көрінеді.
Мойындайды сүйгенін
Сүйген адам,
Жеңілдім мен,
Сүйгендер жеңіледі.