Өлеңдер ✍️

Жырға қоспай бола ма
Тым әдемі қыздарды?
Жыр арнап ем бір қызға,
Мені жарым қызғанды.
Қызғанды да,
Жырымды жыртып-жыртып тастады,
Енді қорғап қайтемін
Өлеңімнен басқаны?!
Осындай да бола ма
Түсінбестік,
Білместік?
Мен жарымды жырыма алғаным ба, күндес қып
Әлгі әдемі ару қыз туып еді қиялдан,
Кетті сөйтіп, ақыры,
Қиялға да сыя алмай.
Тарлығына әлемнің таңданамын мен, тегі,
Жазылмаған өлеңдер өзегімді өртеді.
Қиял екеш қиялды табылды жұрт қаралар.
Қайран шындық,
Мұндайда күнің сенің не болар?!