Өлеңдер ✍️
Өлеңдер ✍️
17.05.2022
98
Айтамын жырмен сырымды...
Айтамын жырмен сырымды,
Айтпасам – ойдың өлгені.
Бала кездегі жырымды
Жігіттік келіп өңдеді.
Естідік небір сындарды,
Азабын жырдың тарттық көп.
Жігіттік жазған жырларды
Өңдейді өзі қарттық кеп.
Қуаныш бар ма, мұң бар ма,
Парағын әрбір қарап бір,
Қарттығың жазған жырларға
Болады өмір редактор.
Саралап барлық ғұмырды,
Ойланып егер қарасақ,
Өмірлік жазған жырыңды
Қарайды өзі болашақ.
Әлеуметтік желілерде бөлісіңіз:
Facebook | VK | WhatsApp | Telegram | Twitter