Өлеңдер ✍️

Қара ағашты жел шайқады кешкілік,
Жапырақтың жалқы жырын естідік.
Қиынын-ай,
құйын қиған тағдырдың
Күн барады кешкіріп,
Біз барамыз ескіріп,
Қара ағашты жел шайқады кешкілік.
Өліарада өкпе артпассың Заманға,
Бауырың бүтін,
басың досым, аман ба?
Ғапыл дүние маған да сын
Саған да,
Үміттерің үсік шалып үзілсе —
Жапырақтай жанышталар табанда.
Өліарада жаңбыр мен қар аралас,
ей, тірлігім!
Жалғыз сәтке қабақ аш!
Тәнін немен жасырады жалаңаш?..
Қоңыр күйді қобыз болып қозғайды —
Жел шайқаған қара ағаш.
...Өліарада жаңбыр мен қар аралас.