Өлеңдер ✍️

  17.05.2022
  77


Автор: Ғалым Жайлыбай

Кер бетегелер

Беткейді бастап өрге төбелер,
Тереңдерімді тербете берер.
Көтеріп басын көрісті күнмен —
Кер бетегелер,
Кер бетегелер.
Тұрғандай Тұран ән құшып тағы,
Есімнен бұл сәт мәңгі шықпады.
Бетегелердің бетін жуады —
Тамыз айының таңғы шықтары.
Бауырын сүйсе белде самалы,
Бетеге басын төрге салады.
Беткейден орын берген тағдыры
Жусанның иісін бермесе-дағы.
Беткейім,
Белім,
Төбеде Күн, Ай,
Кетейін бәрін өлең етіп-ай.
Керім кездермен келісе қалған —
Кер бетегем-ай,
Кереметім-ай.
Көрсетіп көгім төтен өнерді,
Өткінші жауын өте де берді...
Аласа деуге ауыз бармайды —
Беткейге біткен бетегелерді.




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу