Өлеңдер ✍️

  17.05.2022
  176


Автор: Ғалым Жайлыбай

Сіздей асыл табылмас...

Анам келді ауылдан...
Асыл анам,
Аспаған да таспаған
Тасымаған.
Ғашық адам ол өзі ақ дүниеге —
Ақ сүт беріп біздерді асыраған.
Анам келді ауылдан...
Қайран анам,
Шолпан анам ол менің
Айман анам,
Жайған адам жүрегін жарық күнге
Ай нұры боп ұл-қызын аймалаған.
Жылу жетті жаныма жеміс егер,
Өлеңі өмір өренмін
өрісі өнер.
Анам келді ауылдан,
Алатауым,
Қуанышын ақынның бөлісе гөр!
Анам келді ауылдан арна кеуде,
Тамылжып кеп табыстым таңғы әуенге.
Көгал қуып келмегем Көктөбеге
Алматыға келмегем алма жеуге.
Шаңыраққа шырай боп,
Ісіме құт.
Көңілінің көгілдір құсына еріп,
Анам келді ауылдан бір көруге
Жиі-жиі жүрген соң түсіне еніп.
Анам келді ауылдан,
Нұр аймала:
«пана болсын жарығым, құдай ғана».
Мамырың боп күтеді
Тамырың боп —
Азамат пен Саламат,
Гүл — Айдана.
...Алатауға Арқадан Ана келді,
Бір тойлайын жиып ап тамам елді.
Мендей ақын табылар іздегенге
Сіздей асыл табылмас маған енді...




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу