Өлеңдер ✍️

Тандыры кепкен түздердің тазалап тәнін,
Қасат қарларды қақ жарған қазанаттарым,
Алашқа арқа болғандай азаматтарым
Түсіме еніп жүрсіңдер!
Мазалап бәрің...
Жаныңды жаным қандай мұң жаншиды кілең,
Жаншыған мұңнан мен білер аршиды бір ем.
Шерлі шанақтан аққулап күйлер ұшпаса
Киелі қара қобыз да қаңсиды білем.
Айқайға сүрең қоспай ұл айта ала ма екен,
Айтатын сөзін аманда төбеде Күнім.
Уығы мығым шаңырақ шайқала ма екен
Керіліп тұрса керім көз кергелерім.
Барар жер біреу,
мінсең де бөлек күймеге,
Теңіз тірліктің түсінсең сұрапыл әні.
Өзегің талып әй, бала,
өрекпи берме
Оқтаулы мылтық түбінде бір атылады...