Өлеңдер ✍️

Тау қопармадым,
Жар құлатпадым..
Аялай білдім Ардың ақ таңын,
Тірліктің тербеп мәңгі бақтарын,
Қап-қара түнді қайыстай тілген —
ақ армандарым,
Арғымақтарым.
Қырлардан тауып саяны жаным,
Жасыл желегін жаяды бағым.
Өрттей боп өшкен өңінен көрдім —
Батар күннің де баяны барын.
Көмбемді күнде аршыр Өлеңсің,
Қайыстай түннен қамшы да өрерсің.
Мөлдіреп тұрған жанымның жасын —
Тастарға тамған тамшы ма дерсің?..
Түрен түсірсең
Түзде көрейін,
Мәуелеп тұнсаң Күзде көрейін,
Жоғымды өлсем іздеп өлейін.
Есіл де есіл —
Есіл күн өткен
Сізге де дейін,
Бізге де дейін...