Өлеңдер ✍️

Қалмаған есейгенше еркелігі,
Мен едім осы жердің ерке гүлі.
Сен болдың сол ауылдың аты шыққан
Кезінде теңдесі жоқ тентек ұлы.
Балалық бүгін елес ұмыт қалған,
Басқа арман күтіп бізді тұрыпты алдан.
Сен кеттің өжет мінез жігіт болып,
Адуын асау тайға құрық салған.
Оралмас шақты есіңе аласың ба,
Енді арман ағаш атқа таласу да.
Мен сенен дара гүлдеп бөлек қалдым
Әзілқой жеңгелердің арасында.
Кінәлі зулап өткен күндер ғана,
Өзгеше күй шертеді гүл мен дала.
Ақылды әке болып жүрсің бе енді,
Кеп-кеше төбелесіп жүрген бала?..