Өлеңдер ✍️

  15.05.2022
  106


Автор: Ақұштап Бақтыгереева‎

Қысқы жайық

Жайыққа қысқы қараймын,
Емеспін құмар тасқынға.
Кешегі ерке ақ айдын
Көк мұздың жатыр астында.
Жағада тұрмын қызыға,
Көтерер ме екен шананы?
Жылдан-жыл оның мұзы да
Жұқалтаң тартып барады.
Өзімнен ерке аруым,
Ән-жыры болған қаншаның.
Саябыр тартқан ағының,
Айтсаңшы неден шаршадың?
Кемелер өткен ұран сап,
Оларда бүгін не айып бар?
Жүзуді еркін тұр аңсап
Қаңтарған аттай қайықтар.
Ұрпағым аң-таң болады
Айтылған ба деп жай аңыз.
Жалғайды екі жағаны
Шұбалған мұзда жаяу із.
Асауды жегіп шанаға,
Аңқытып Мұхит өлеңін.
Мен болсам, арғы жағаға
Зулап бір өтсем деп едім!




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу