Өлеңдер ✍️

Әй, Елпеңбай-ай,
Бай-бай-бай!
Құрыдың ғой енді
Қу құдай-ай...
Бастығыңды боқтапсың,
Арғы аталарынан түк қоймай
Бергі әкесіне кеп тоқтапсың.
Ол аз болғандай
Еден сыпырушыға барып оттапсың.
Жұмыс уақытында қызып алыпсың,
Сөйтіп жұмыс тәртібін аздап бұзып алыпсың.
Одан көшеге шығып милиционердің түймесін
Ескерткішке деп үзіп алыпсың.
Осы сенің не жының бар?
Мас кезіңде алдыңда түйе тұрса да
Қағып кетесің.
Қой деген Телпеңбайдың терезесін
Күл-талқан ғып шағып кетесің.
Үйінен анда-санда
Үш күнге қашып кетесің,
Өзгенің қалтасын өзіңдікіндей көріп
Тары шашқандай қылып шашып кетесің,
Сөйтіп, өз абыройыңды өзің ашып кетесің.
Өстіп жүріп жұмыстан шықсаң
Дүние кезіп қаңғып кетесің.
Сырахана мен дүкеннің алдын
Алқаштарға ұқсап аңдып кетесің.
Одан да ертең бастыққа
Әйеліңді ертіп кел.
Ұялмасаң да ұялған сияқты болып
Қызара бөртіп кел.
Молданың алдындағы шәкірттей
Басыңды салбыратып жібер.
Шынында да алқаш болғаныңды білдіру үшін
Шашыңды жалбыратып жібер.
Аузыңа су толтырып алып,
Біраз үндемей шыдасаң
Басекең жібіп қалар.
Түлкінің күшігіндей болып біраз жүрсең
Жаман атың да ұмыт болар...