Өлеңдер ✍️

Тыңда, әлем, мен бүгін бақыттымын,
Жүрегім мұңаюдан тапты тыным.
Шалқыған шаттығым бар бір басымда,
Құлпырып бүгін шешек атты гүлім.
Жаныма құйылғандай күн сәулесі,
Жайнап бүгін кеткендей өмір көші.
Ей, тағдыр, бар өкпемді ұмытайын,
Сен де мынау өмірдей еркелеші.
Шет қалма, кешірдім мен бүгін бәрін,
Құшақ жайсам өзіңе тығылмағын.
Кінәлі болсаң дағы тілемеймін
Мен бүгін ешбір жанның жығылғанын.
Сағынып көптен күттім бұл күнді мен,
Күттім, өмір, осынау күлкіңді мен.
Бүгін шық та өзгеше мөлдірейді
Қуаныштың жасындай сүртілмеген.
Өмірге қайта келдім тәй-тәй басып,
Шаттығым сыймай барад асып-тасып.
Өлеңім, ашылды арнаң,
Тасы енді
Алысқа арманымды алып қашып.