Өлеңдер ✍️

Айыбым бар алдыңда өтелмеген,
«Өте!» дедің.
Кешірім етер деп ем.
Ерік бар ма менде енді, төгілейін,
Бір шалқуға жалының жетер ме, өлең?
Айыптымын шынында,
Айыптымын,
Жаза алмадым сендерге лайықты жыр.
Көбелек ем қанаты отқа күйген
Келеді өмір аз-аздап айықтырып.
Ақ жаныммен тілейтін бір тілегім,
Жандарыңды баспасын түн түнегі.
Наз орнына көздерден жас ақпасын,
Үзілмесін осы шат күлкілерің.
Ойламаңдар мұңайып қалыпты деп,
Өздеріңе жүрмін ғой жарық тілеп.
Қарындастар бар кезде жазалайтын
Жүре бергім келеді айыпты боп.