Өлеңдер ✍️

Тағы да туған ауылға
Оралдым бейне жыл құсы.
Қайдасың, достар, қайдасың,
Балалық шақтың құрбысы?
Шығыңдар күліп алдымнан,
Сағынып жеттім мен бүгін.
Қондым мен туған айдынға,
Еркелеу менің ендігім.
Айтпағын бүгін, құрбыжан,
Өткенді мәңгі ұмыт деп.
Қоштасар сол бір жылғыдай
Қолыңды бергін күліп кеп.
Қолыңды бергін күліп кеп,
Қиналып тағы қоштасам.
Кідірмей алға жүріп кет,
Тоқтасаң тағы от басам.
Алаңсыз күнім, ақ гүлім,
Көлбеңдеп өтсін алдымнан.
Оралсын балаң, шат күнім
Жылдармен жырақ қалдырған.
Келіңдер, достар, аңсаған,
Кіріңдер үйге күліп кеп.
Сағынуменен шаршаған
Қалайын мен де биіктеп.