Өлеңдер ✍️

Ай артынан айлар өтті
Уақыт жібін жалғамай.
Ғашық күндер қайда кетті
Бүгіндері, жалған-ай?
Алабұртқан сезімменен
Нұрланушы ед бар маңай.
Түні бойы көз ілмеген
Кездер өтті, арман-ай!
Қайырмасы:
Думандатып жүретұғын көшені
Қайран күндер, сайран күндер кешегі.
Сағыныштың бір жұлдызы жанымда
Жылт-жылт етіп күнде жанып өшеді.
Алаңсыз шақ еске түссе жанымды
Жадыратып бір жылылық еседі.
Ақ сезімнің айдынында тербелген
Маңдайымның бағы бопты-ау бес елі.
Естен кетпес тәтті шақтың
Тым алыста қалғаны-ай.
Сағыныш – дерт жанға қатты
Батты бүгін, арман-ай!
Еске түсіп сайран күндер
Дегбірімді алғаны-ай.
Қиял қанат жайған күндер,
Арман, арман, арман-ай!
Қайырмасы:
Думандатып жүретұғын көшені
Қайран күндер, сайран күндер кешегі.
Сағыныштың бір жұлдызы жанымда
Жылт-жылт етіп күнде жанып өшеді.
Алаңсыз шақ еске түссе жанымды
Жадыратып бір жылылық еседі.
Ақ сезімнің айдынында тербелген
Маңдайымның бағы бопты-ау бес елі.