Өлеңдер ✍️

Ассалаумағалейкум, Жаңа жылым,
Сыйлайтын бар ма қандай жаңалығың?
Мен ертең тағы бір жас есейемін,
Бір жасқа алыстайды бала күнім.
Түзетіп азды-көпті шалалығын
Бір жасқа есейеді бала жырым.
Тағы бір бетін ертең тауысамын
Өмірдің жастық атты тарауының.
Татамын басқа жылдың дәмін ертең,
Мейлі ғой, бейбіт күннің бәрі көркем.
Басқа жыл, сыйлағын тек тыныштықты,
Жіберме бейбіт күннің сәнін өртеп.
Бір жасқа ертең менің өседі елім,
Осы ғой көгергені көсегемнің.
Әкемнің ақшыл шашы қоюланып,
Қартая түседі-ау тек шешем менің.
Болғын тек жеңіс жылы ғарыштағы,
Тағы да төгілмесін арыс қаны.
Қуанам, қарғыс атқан соғыс жылы
Бір жылға бізден тағы алыстады.
Тағып ап тұлпарыма өмілдірік,
Биікке тартам ертең төгілдіріп.
Әзірге жүрші, досым, сәби жылды
Қайтайық ақ шампанға шомылдырып.