Өлеңдер ✍️

  15.05.2022
  115


Автор: Нүсіпбай Әбдірахым

Кеше гөр мені, құрбыжан...

Кеше гөр мені, құрбыжан,
Кешірек маған кездестің.
Мен үшін сен тек сыйлы жан,
Мұңыңды мүмкін сезбеспін.
Көзімді байлап тастар ем,
Жатпайды-ау мынау көзді ешкім.
Көзімнен көргін, жасырман,
Басқаны сүйгем кезіңде.
Мұңы да өткен басымнан,
Жеңілгем отты сезімнен.
Өкінгем,
Тым кеш өкінгем,
Өш алып өзім-өзімнен.
Ол кезді еске ап қайтейін,
Өткен де кеткен ол күндер.
Жығылған жоқпын әйтеуір,
Күл болған жоқпын өртінде.
Солқылдап бірақ қалғанмын,
Құлатам десең еркіңде.
Қалтылдап жалғыз қайықтай
Келемін дауыл өтінде.
Қаласаң аман алып қал,
Көз жазып қалсаң өкінбе.
Құрдымға батып кетпеймін,
Жетемін жердің шетіне.
Дауылдан өтем, жауыннан,
Шетіне жердің жетемін.
Жана алмай жүрген жанымды
Жауыннан аяп не етемін?
Еркіңмен беріл берілсең,
Аялап сені өтемін!




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу