Өлеңдер ✍️

Қуанышты қолдан жасау қиын ба?
Мұңайма да көз жасыңа жуынба.
Айналаның бәрін бір сәт ұмытып
Үнсіз қалғын құшағыма тығыл да.
Анау да мұң, ойлай берсең, мынау да,
Себеп те көп күрсінуге,
Жылауға.
Көктемеде күліп тұрған көк терек
Күз келгенде оранады қырауға.
Кедергілер тұрған шығар алда сан,
Тағдырмен де тек сол үшін дауласам.
Келер күннің не жазғанын көрерміз,
Құшағыма тығыл, күнім, жаурасаң.
Шаршамайтын шат қылықтым,
Күйрегім,
Үнсіз қалғын, мұңайма да күлмегін.
Тапжылмайтын Темірқазық жұлдыздай
Қашан болсын сеніменен біргемін.
Сенің өмір аспаныңның көгінде
Кетсе дағы барлық жұлдыз көрінбей.
Жолыңды әлсіз шуағыммен жарық қып
Түндер бойы тұра берем ерінбей.
Ал күндіз бе?
Орнымдамын күндіз де,
(Күліп жүрсең барлығымды білгізбен).
Ақ жүзіңе тұрам үнсіз табынып
Алтын күннің арайына сүйгізген...
Жүрегімнен жайып салған жай мұным,
Жат емес қой маған да әсем жайлы күн.
Ризамын тек анда
-санда еске алсаң
Сол шоғырда тілектес жан барлығын.
Бақыт қашан қонады деп басыма
Төзіміңді тауыспа да жасыма.
Сағыныш боп қалады осы шақтар да,
Жақындашы... жақындашы қасыма.