Өлеңдер ✍️

Өмірде бір өзіңді сүйіп келем,
Сағынып-сарғаюмен,
Үмітпенен.
Кей сәттер шалқып кетсем, сүйіктім-ау,
Кей түндер арпалысам күдікпенен.
Арпалысып қинаған күдікпенен
Басымды имей, білдіртпей жүріп келем.
Жанды тырнап жатса да қара мысық
Кездескенде жаныңа күліп келем.
Кездескенде жаныңа күліп келем,
Бара жатқын, мейлі, өзге жігітпенен.
Сол сәттерде мен саған күліп емес,
Алабұртқан жүректі тіліп келем.
Тұрса дағы от болып күйіп денем,
Тесілемін соңыңнан үмітпенен.
Күлкілі боп көрінер,
Кінәлама,
Жас өмірді осылай сүріп келем.