Өлеңдер ✍️

Бүгін мейрам! Бір күй жаулап санамды,
Қолға еріксіз алдым сырлас қаламды.
Көгілдір түс толқындатып алаңды,
Алтын шапақ аймалауда даламды.
Бергендейін екеуін де шақтап бір,
Жарасып тұр көгілдір түс,
Әппақ нұр!
Әсемдіктің әр мысқалын дүние
Аясына сақтап тұр.
Шаттық кернеп бара жатыр даланы,
Шаттық кернеп бара жатыр қаланы.
Көк жүзінде ақ көңілдей ақша бұлт
Аққудайын әсем жүзіп барады.
Орындалған ел тілегін мият қып,
Шаттық-бұлақ көңілдерде тұр атқып.
Көк аспан да мөлдірейді тұңғиық
Қазағымның көк байрағы сияқты.
Тәуелсіздік!
Одан асыл бар ма әнің?
Күнделікті күйбең тірлік қалғаны.
Талай ғасыр аңсап өткен “аһ” ұрып
Орындалды ата-баба арманы.
Бар адамды жіберетін туыс қып,
Жаса, жаса, Теңдік пенен Тыныштық!
Енді елімнен арылмас-ау ырыс-құт,
Соқаны ешкім соға қоймас қылыш қып.
Мүмкін емес уақыт көші тоқтауы,
Естілмес-ау енді ананың жоқтауы.
Адамзаттың өз қолымен тұрғызған
Жарыла да қоймас сұмдық от тауы...
Өрт те шалмас өлең тұнған жотаны,
Бастан тартпас ешкім ерке ботаны.
Бар қандасым үмітпенен көз тіккен
Сенем саған, қасиетті Отаным!