Өлеңдер ✍️

Саған құймас еш арнамен ақпаймын,
Жақындыққа жетпей жүрген жаттаймын.
Бар құпиям саған ғана арналған
Айтары көп, тыңдары жоқ хаттаймын.
Тонауына ұшыраған дауылдың
Талшыбықтай мейіріміңді сағындым.
Қалқам, саған көкжиектен көз тігіп
Жете алмастан мөлдіреген сағыммын.
Көкірегінде көктем болса талмақ кім,
Сан арманды қызғалдақтай қаулаттың.
Мен дегенің бар әлемді шарлап кеп
Саған жетіп жығылатын қаңбақпын.
Күшіменен бір керемет сыйқырдың
Түн ішінде төрт бөлемін ұйқыңды.
Мен таңдаған соқпақ жолдың барлығы
Саған ғана апарам деп ұмтылды.
Кемпірқосақ бояуындай мың түрлі
Жаның көркем, күлкің сондай сүйкімді.
Мендегі бар армандардың арманы
Саған ғана арналғандай біртүрлі...