Өлеңдер ✍️

Асығасың сен несіне күн санап,
Өзгермейді ғасыр өтсе жер ғажап.
Өзгермейді табиғатта ешбір зат,
Өзгеретін жалғыз ғана күн парақ.
Əлемдегі өзгерістер мəңгілік,
Табиғатта бұлжымас ол заңдылық.
Өткен ғасыр аттанғанда тарихқа,
Келер ғасыр берші өмірге мəнділік.
Өзгерістер болып тұрад заманда,
Өзгерістер кілті əр кез адамда.
Бірақ соның оң мен солын танитын,
Білім болсын жан-жақтылы санаңда.
Көнерсе егер жаңала бас киімді,
Таза ұстасаң Қызыр шалар үйіңді.
Бір жаңалық орнамай ма өмірге,
Жаңа деген ой торласа миыңды.
Басталды «ашу» міне біздің өңірде,
Көп жаңалық кіреді нақ өмірге.
Сəтті болсын деп тілейік бəрі де,
Алаңдаулық болмай ешбір көңілде.
Жаңалыққа жаны құмар жастарым,
Өзгерсе де тұрмыс, əдет-салттарың.
Ғылымилық көзқараста болыңдар,
Əнін айтып əуейленбей басқаның.
Өзгермесін мəнді тұрмыс сəніміз,
Өзгермесін айқай-шуға əніміз.
Киімдерге тағы келсе қысқарту,
Маймыл болып кетпейміз бе əлі біз?
Өзгерістер болса екен оңынан,
Кенеттен бір құйын соқпай жолынан.
Жастарымыз жарамды боп өссе екен,
Еріп кетпей əзəзілдің соңынан.
Тарихта кім жеңілді, жеңді кім,
Бір жыр еттік ақиқаттың ерлігін.
Өзгермесін бейбітшілік берекең,
Өзгермесін тұтастығың, елдігің.
Қару болмай қалғаннан соң шоқпарда,
Отты қару енгізілді жоспарға.
Білтесіне от тисе егер қайтеміз?
Ажал тілеп тұрған сол бір оқтарға.
«Ыстығы асып» тұрған мынау дүние,
Есі ауысып қалса оған кім ие?
Он сегіз мың ғалам атты тіршілік,
Бірақ күнде болары хақ күл-күйе.
Кесірінен сыңар жақты тануың,
Кездестірдің зиянында дамудың.
Бүлінуі ластанып ортаның,
Көз жеткен соң өкінішке қалуың.
Адамзаттың ортақ ізгі тілегі,
Өзгермесін жер шарының реңі.
«Даму шындық дау жүрмейді қағида»
Халық бүгін бұл тəлімді біледі.
Білмей тұрып көзсіздікке ұрынба,
Сəтсіздіктер аз болды ма бұрында.
Қара дүрсін бұйрықшылға жол бермей,
Жүгінейік заң мен нақты ғылымға.
Жол көрсетер өміріңе ақыл-ой,
Айту керек қоғамға əркім ашық ой.
Күрделі өмір күреске де мұқтаж,
Өмір күнде емес ұлан-асыр той.
Шабан жүрмес сипай қамшылағанға,
Ашық айту керек кейбір адамға.
Жұмбақ жазып шешуін тап демеңдер,
Түрткілік ой айтам десең қоғамға.
Жаңа ғасыр туылған тың тақырып,
Дала жатыр ұлы ойларға асығып.
Əлқисасын сəт қадаммен бастайық,
Бойды билеп жүрмесін тек асылық.